جاڭا نىساندا قۇلسارى قالاسىنىڭ تۇرعىندارى ءۇشىن 30 جۇمىس ورنى قاراستىرىلعان. مامانداردى گوللانديانىڭ تاجىريبەلى اگرونومدارى مەن تەحنولوگتارى دايىندادى. قازىرگى زامانعى قۇرىلعىلارمەن تولىق جابدىقتالعان جىلىجايدا تامشىلاتىپ سۋارۋ ءادىسىن قولدانادى. «اتىراۋ – ساۋدا» جشس ديرەكتورى ءالىمجان بايجىگىتوۆتىڭ ايتۋىنشا, جابدىقتار تشو-نىڭ مەردىگەر ۇيىمدارىنىڭ ءبىرىنىڭ قولداۋىمەن الىنعان. وعان 2 ملن ەۆرودان استام قارجى بولىنگەن. ال قۇرىلىستىڭ ىسكە اسۋىن كاسىپكەر جەكە قاراجاتى ەسەبىنەن قارجىلاندىردى. العاشقى ءونىم بىرنەشە ايدان كەيىن جەمىسىن بەرە باستايدى.
«جىلىجايدا وسىرىلگەن كوكونىستەردىڭ ساپاسى جوعارى بولادى. جاڭا جابدىقتاردى, كوشەتتەرگە قوسىمشا كۇتىم جاساۋدى, سۋدى تازارتۋ جۇيەسىن, تامشىلاتىپ سۋارۋدى قولدانۋ ارقىلى وڭ ناتيجەگە جەتەمىز دەگەن سەنىم بار. ءبىزدىڭ باستى ماقساتىمىز – جەرگىلىكتى ونىمدەردىڭ حالىققا قولجەتىمدىلىگىن قامتاماسىز ەتۋ»,-دەدى جوبا باستاماشىسى ءالىمجان بايجىگىتوۆ.
اتىراۋ وبلىسىندا جىلىجاي اشقىسى كەلەتىن كاسىپكەرلەر قاتارى كوبەيىپ كەلەدى.جاقىندا ماقات اۋدانىنىڭ دوسسور كەنتىندە جىلىجاي اشىلدى. ماحامبەت اۋدانىندا 10گەكتار ونەركاسىپتىك جىلىجاي سالۋ جوسپارلانىپ وتىر, ول ءۇشىن جەر ۋچاسكەسىن ءبولۋ ينفراقۇرىلىم جۇمىستارى جۇرگىزىلىپ جاتىر.
باقىتگۇل باباش,
«ەگەمەن قازاقستان»
اتىراۋ
